الضلمة..

زمان كنت بخاف من الضلمة ،   كنت بخاف من قفلة الباب و الليل لما ييجي و مكنتش بحب أبداً جو النوم ف الضلمة و الشباك مفتوح.. كنت بخاف من حاجات غريبة..  اعتقدت  إني لو نمت ف الضلمة و مش متغطية من أولى لآخري هييجي حرامي و يقتلني أنا أول واحدة  * عشان كان دايماً وارد ف دماغي إن أنا بس اللي مستهدفة يعني :'D *

فا كنت بتمم كل يوم اني مش باينة خالص على أساس إن لو جه حد فعلاً يسرق اللي يسرقه و يفتكر إنه مفيش حد و يمشي . 

ف نفس المرحلة دي كنت بخاف جدا من الكبريت ،  و إنه ازاي الكبار بيولعوه كدة عادي من غير ما يخافوا. 

كبرت و كل فترة كنت بلاحظ تطور ف الحاجتين دول ،  بس للتعافي.. 

بقيت بستخدم الكبريت عادي جدا و بولع الكبريتة و تتطفي و أولعها تاني لحد ما كلها تسودّ ،  و مبقيتش أخاف منها خالص. 

و بقيت بحب الضلمة ،  بحبها جدا ..  أحسن فرصة ممكن أفكر فيها ف كل حاجة  و أدقق فيها ف كل فكرة ،  أو أركز مع حاجات مابتتلاحظش  ف الأوضة لحد ماتعب وأنام.. 

مع الوقت اكتشفت إن كل ما تفكيري زاد كل ما بدأت أحب الضلمة أكتر  و كل ما بقيت أكثر شجاعة ف التعامل مع الحاجات اللي بخاف منها دي.. 

 أنا دلوقتي بحب البيت كله يبقى مفهوش نور بالليل ،  و مبقيتش أخاف إن حرامي ييجي و بقيت بحرق عود الكبريت أكتر من مرة و اتسلي جدا بده   ،  لأني بقى عندي حاجات أفكر فيها أكتر و أعمق بكتير من إن تبقى مشلكتي ضلمة أو نار أنا اللي متحكمة فيها  أو إني مش متغطية للآخر !