©-©

بما إن الجو العام بيأكد عليا كل دقيقتين بإن ده وقت الامتحانات فلازم كل الأفكار اللي عايزة أعملها ف حياتي القصيرة عموماً تيجي دلوقتي ..

مش هكتبها كلها بس هكتب أكتر حاجة نفسي أعملها بعد ماخلّص على طول ،  نفسي أتصور صور كتير جداً blurred و حلوة و غير محددة المعالم و غير مقصودة بالمرة مع كل الناس اللي بحبهم ف حياتي ،  و أحتفظ بيها ف فولدر  أرجعله كل فترة عشان اختار منه أكتر اتنين تلاتة أربعة عشرة حلوين كدة و اقعد اغيّر فيهم ،  بقالي فترة كبيرة ماتصورتش خالص ،  خالص ،  الصور ملهاش لازمة أساساً بس بحبها ،  بحب التوثيق بشكل عام و محتفظة بحاجات عليها تواريخها من سنين و من ضمنها صور و رسومات  من كتر ما قدمت بدأت تتاكل من الجناب ..


لكن الحقيقة انا بحب كدة ،  و بحب النوستالجيا و كل الأشياء و المتعلقات القديمة اللي مبقاش ليها صاحب ..

بحاول أتخيل مكان ما ملكية شخصية ليا ،  جاليري صغير أو حتى كشك أعمل فيه اللي عايزاه كله ،  تقريباً ممكن محدش يشوفني على أرض الواقع بعدها  غير لما احب اطلب حاجة من بره مثلاً ،  أو أزهق ،  بس الاحتمال التاني أكتر عشان مبحبش الأكل..


و آه الرسايل كمان ،  اخلي صحابى كلهم يكتبولي رسايل حتى وانا واقفة قدامهم عشان احتفظ بيها  ،  واحدة صاحبتي زمان كانت كل ما ناخد فترة منشوفش بعض تعدي عليا ف البيت نسلم و نقعد و بتاع و تجيبلي الرسايل دي ،  و تقريبا ف كل مناسبة  ،  يمكن أكتر حاجة مضايقاني لما افتكر الكلام ده إن الرسايل دي تقريباً كلها ضاعت ،  بس اللي مهون إني فاكرة تفاصيلها كويس جدا ،  بكل الشجر و الورد و القلوب اللي كانت بترسمها و شكلي لما كانت بترسمني حاجة مبتكرة والله :'D

الأمنية التانية إني أعثر أو حد يعثرلي على محل قديم بيبيع أنتيكات  مثلاً ،  و أروح أصرف اللي ورايا و اللي قدامي  ف كاميرا قديمة أو أجيب  حاجات من اللي بتتحط كتُحف  دي  * معرفش هحطها فين أصلاً  *
أو اصحى الصبح الاقيها تحت المخدة مكافأة حسن سير و سلوك  ..  مش هقول لأ يعني

التالتة إني اعمل لوحة كبيرة اوي ارسم عليها راندوملي اي حاجة و اعملها باكجراوند لفوتوسيشن لطيف صغير فوق السطوح  و اضحك ع العيال الصغيرة  و اكسب من وراهم..

الرابعة إني اروح اذاكر دلوقتي علشان ماضطرش اذاكر ف الشهرين اللي عايزة اعمل فيهم ليستات كاملة من حاجات زي دي

البوست ده ملوش أي تلاتين لازمة ،  بس بالنسبالي مهم جدن  ،  فا ويلكم تو  مركز الكون بتاعي  و اتمنى مايكونش في تعارض أو تشوش مع مراكز الأكوان المجاورة

اول ماي لوف اول ماي  فانز
<*0\
/0*>  ❤