لو يوم واحد بس!

كلام قديم من سبتمبر ٢٠٢٠- إعادة نشر 

سيناريو اتعاد خلال الشهرين اللي فاتوا في حدود ٥ : ٧ مرات بدون أي نوع من أنواع التجديد، بدون أي نوع من أنواع التعلم.

بتعامل مع المخ على إنه آلة، لو خططتلها هتعمل بالظبط كل الكلام الغير منطقي اللي بقوله، هتديها مدخلات هتطلعلك مخرجات بدون أي تفكير أو حساب لكونك ذو طاقة أكثر محدودية وأقل كفاءة بالطبع من الآلة. 

مش فاكرة امتى آخر مرة مكنتش فيها عايزة يوم زيادة برغم إنه كان عندي سلاسل من الأيام وضيعتها، مش عارفة ليه دايما الوقت الضايع أفضل وأحسن وأسرع في النتايج كمان.

دايمًا محتاجة وقت قليل غير كافي وبسميه ( زيادة) ، دايما عايزة فائض غير مفيد بس علشان يباعد بيني وبين النتيجة الحتمية واللي هتيجي سواءً كنت جاهزة ليها أو مش جاهزة. 

 دايما بحس كل قراراتي كانت مستنية شوية وقت تنضج، كنت محتاجة كمان مرة افكر فيها قبل ما أقول كذا/أعمل كذا 

بلاحظ اني مش بطلب كتير، لو باقيلي يوم بطلب ساعة زيادة، لو باقيلي اسبوع بطلب يوم زيادة، وبقضي طول الساعات اللي قبل الساعة الزيادة دي بتأمل ( ياه لو اخدتها، ياه لو حصلت معجزة وطُلت الزيادة) لحد ما أكتشف إني بطلب حاجة تساعدني في إغفال دوري الشخصي.. بطلب مسكن يحسسني انه الوقت ممكن نتحكم فيه ويطول ويمتد، كأنه هدفي من الزيادة هو ذاتها، وانه طبعا أكيد المعجزات تحدث في العادي وكل يوم حد عايز ساعة زيادة بياخدها أكيد بس هو يمكن الأوبشن لسة هينزل عندي. 

دايما بحتاج أحس بالأمان من ناحية الوقت وإني لسة باقي شوية على ما أدخل الحلبة، أصله أنا مش جاهزة دلوقتي، ولو قعدت ١٠٠ سنة ببص عليها من برة وبعرق وارتجف هفضل كدة لحد ما اموت لو مفيش وقت يزقني عليها عشان أتخطى النقطة دي. 

دايما عايزة النتيجة اللي بتخيل انها هتحصل بوجود وقت الأمان ده، دايما بتخيل اني دايما قدامي فرصة للهرب والهرب الغير منتهي كمان. 

سراب أسعى وأزحف ناحيته بترقب أقوى من ترقبي للموعد الحقيقي، المعجزات أظرف في وقوعها من الأمور الحتمية. 

لكن في النهاية، يظل المطلوب مني فعله منتهي عند يوم محدد، يظل السراب حلو وخادع ولكنه وقت زايد بلا فايدة وبلا هدف، يظل السراب ريح عابرة لا تغير ساكنًا ولا تريح مضطرب، ولا تزيدني سوى رغبة في كمال لم ولن يحدث بأي شكل كان.. يمكن بتحسسني باضطراب وجزع أشد من العادي لأني طلبت الوقت بدل الضايع أهو ومحصلش تعويض ولا حاجة.. بدل حرق أعصاب تقريبًا. 

ودا يمكن يكون أصعب شئ لإقناع نفسي بيه، لا كمال ممكن.. ولا الدقيقة الزيادة ولا الناقصة هتخليني أتفادى حاجة مكتوبة.. يا رب أفتكر الكلام الملخبط دا وقت ما اعوزه.