Slowly progressive

كل يوم ببص لنفسي بشوف شئ مختلف عن الأيام اللي قبله، عن الاسبوع اللي قبله، عن نفس اليوم بس السنة اللي قبلها.

كلها تخضع للمصطلح slowly progressive أو متقدم ببطء.

برغم إني بحاول مبقاش إنسان متسرع، يقف للنتائج ويفتش عن العائد وينظر للأمام أكتر كتير جدا من نظره لما هو تحت رجليه -  إلا اني في وقت ما، بوصل لدرجة مشتتة تضيع توازن ما تحت رجليّا وبالتالي تترنح الصورة اللي فضلت باصالها كل الوقت ده.

دايما في متابعتي لخط سير فروع حياتي بحط كل تركيزي في slowly وبتجاهل كونه progressive.

أن تكون السرعة وحدها هي الشغل الشاغل دي لعنة، بتخليني اصنف البشر حسب سرعاتهم اللي بتساعدهم على القفز بين أمور الحياة بشكل دارج لدرجة اني احس ده العادي، بتخليني أعتبر إنه كل شئ محترم وكلام جميل بس ايه ده، اخدت فيه كام سنة؟ عشرين؟ لأ برة عني.

كأن لو معملتش الشئ ده في السن ده فاستحالة اني معملهوش كبيرة ، ما انا الوقت عداني خلاص، كأن فاتني منه حتت لأني بطيئة ومهما احرزت من تقدم فمش هحس بحاجة لأنه هيكون progression صح وهنعلم عليه في الجدول، بس، ملوش قيمة.

الحسبة دي بتحسسني دايما انه فيه كرباج على شكل ساعة رملية يهدد حياتي واتزاني، وبيقولي progressive مين انا مبفتحش تقييم التقدم الا بعد ما يوصل تارجت معين من الوقت، أقصاه تخلصي كل اللي وراكي وتخلصي كمان خطوات حياتك كلها على بعض كدة وتتصرفي في خلال يومين، وليه يومين كفاية خمس دجايج.

يا رب اتخلص من لعنة اللوم، ومن لعنة الوقت، واعرف اشوف خط سيري الذي هو slow but progressive

لأي حد فاكر انه لما سوق تنتهي الكرباج الجلد المجدول اللي بيظهر من العدم هيختفي، اتفضلوا