Authentic life

العنوان تضليلي.

امبارح شوفت حاجة و تقريبا اول مرة اشوف حاجة ليها قيمة، منين تيجي القيمة؟ لما الحاجة تحسها موجهة ليك شخصيا، لما تكون جاية كأنها مركّزة لما تريد، فتسعى للحل و تفضل مترقب يا ترى إيه هيكون الحل الجوهري.. يا ترى فين العصاية السحرية اللي هتقلب حالي؟ 

الأمر صعب شوية أحيانًا لما تدرك إنه أمر الانسان غير سحري على الإطلاق، كل حاجة بالتصوير البطئ، الصبر جزء لا يتجزأ من اي حاجة.

 

- refer to the previous post -

اكيد التعجّل مشكلة بس مش هطرح العكس كتساؤل حفاظا على إدراك أي حد بيقرا الكلام ده و كفاياكم أزمات إدراككم اليومية. 

امبارح عرفت كام حاجة جديدة، عرفت انه فيه مصطلح اسمه تقدير الذات، كنت متعودة اقراه بس، لكن مكنتش متخيلة إنه مشكلةٍ ما لو قلّ، ولا إنه شئ ما مستقل بذاته في النفس الإنسانية.. لا و كمان محتاج مني تدريبات عليه :D

يعني هو انا ناقصة التزامات تجاه نفسي اكثر مما انا عليه، اه مبنفذش منها حاجة بس لسة اسمها التزامات، ولا ايه؟ 

عرفت كمان للمرة الخمستلاف إني جسمي دايما في حالة ال fight or flight، تقريبا ٢٤ ساعة في ٢٤ ساعة.. بعيدا عن التوتر المعتاد انا بخلق توتر لأني عودت نفسي على ده

المفروض العنوان كان يبقى اسمه ".. و نفسك على ما تعوديها" بس انا لسة فاكرة العنوان ده دلوقتي و مش هغيره عشان مغيرش جملة البداية.

قريت كمان اني اسلم محاولات تفريغ أدمغتنا المرصعة بعدم النشاط او الركود و السكون في احيان كثيرة هي الكتابة، افتكرت لهذا السبب الفترة الطويلة اللي اعتدت اني اكتب فيها مذكراتي..

كانت فترة ظريفة ، بعيدا عن اني عمري ما كنت مڨيلتة كل جوانب حياتي ( حبيت استخدم المصطلح الغبي ده لغاية ما اتعود عليه) إلا أنه في هذه الفترة كانت دماغي دائمة التفرغ و دائمة الجدية.. شوفت كمان مقتبسات من كتاب ما انه المخ بشكل او بآخر بيعيد خلق الذكريات مش بيستعيدها، و ده معناه اني ممكن اكون مش فاكرة اصلا بس بخلق ذكرى قديمة تحسسني اني لازم اجدد عشان اوصل لهدف كان موجود من قبل.

احيانا بفكر انه ده مش هدف لذاته ، الهدف انك تطلع لقدام مش ترجع لورا، فاهمين؟

إعادة خلق وتركيب الماضي فيه مشكلة لأنه دوريا برجع من مشكلة لمشكلة، لا شئ يتم تصحيحه، إنه فقط الاستبدال. 

Sighs

معلومات كتيرة جدا قريتها و سمعتها في وقت قصير و خلُصت منها لحاجة واحدة :

افتحي البلوج و اكتبي الكلام ده و سيبيه للناس تشاركك..

فيه كتاب بردو كان بيقولي دايما تسألي ' ايه الفايدة' من اي شعور تحسيه.

فإيه الفايدة بقى من البوست ده؟ ايه الفايدة من مشاركة الورقة المشخبطة دي من دماغي؟ 

اهه عشان كدة :D

رد كافي ومقنع بالنسبالي، أؤمن بترك الحرية لي في فعل ما أشعر بيه سواء كويس او وحش.. 

مش عارفة اختم ازاي بس اتس أوكاي ، اللي وصل هنا يستحق يعرف عن حاجة اسمها kaizen.. بهزر كلكم تستحقوا ♥️

Don't tap here