همممم
متهيألي زهقتوا من المقدمة الاعتراضية عارفين، لكن معنديش مقدمات جديدة.
بس انا حبيت النهاردة أقولكم حاجة بتتقال كتير و كان بتدور في دماغي طول الوقت و بقول ايه العبط ده و هي مجرد جملة طلعت بدون اساس و هتنتهي بدون اساس و تقريبا خلقت لجمع اللايكات و قديما لجمع التهليل على طاولات المقاهي المتهالكة.
ليه السر في الرحلة؟ ها؟ ليه؟ ليه الكنز في الصبر و ليه دايما التعب هو السر و البلا بلا بلا هي اللي لازم تتقدر مش النتيجة النهائية.. مش عارفة يمكن انا اللي مش عايزة احس اني لازم اتعب، يمكن انا اللي عايزة الإجابة لحاجة ملهاش إجابة ، أو لحاجة إجابتها مش موجودة دلوقتي، أو يمكن تكون مش موجودة أصلاً.
أنا متضايقة أوي إني زانقة نفسي في ركن و طالبة من نفسي إجابات هي مش قدها، طالبة منها تتشيك غصب عنها و تدخل لجنة في اوضة ضيقة جدا متر في متر قاعدة و قاعدة قصدها انا بردو و هاتك يا دعك.. أسئلة أسئلة أسئلة في حاجات انا عمري ما هعرفها و عمري ما هعرف ابررها، لا الحقيقة مش عارفة، تشتمني، لا الحقيقة مش قادرة افهم دي حصلت ليه، مانتي عشان كذا كذا، طيب ليه الغلط؟ الغلط بردو غير مبرر، حاجة غريبة جدا.. طيب حتى ليه متقوليليش اني شيك النهاردة؟ دانتي انسانة غريبة جدا.
و بعد كدة تقولولي السر في الرحلة؟ رحلة ايه يا ستي؟ الرحلة اللي اتدعكت فيها في التراب معنويا؟ الرحلة اللي اتحطيت فيها تحت الضغط و اتقالي يلا هاتي أعلى ما في خيلك.. يلا اتصرفي و اعملي اللي تقدري و اللي متقدريش تعمليه.. يمكن ده عشان اقدر الشياكة اللي كنت فيها؟ aka الحاجات اللي بقدر اعملها، الحاجات اللي بقدر اتغاضى عنها، قدرتي على تمييز انه الولية اللي جوة اللي بتعصرني دي بالفعل مچنونة
Comments
Post a Comment