It's malario

صباح الخير بالليل/الصبح/الفجر/أي وقت.

حبيت اعترف اعتراف مهم في هذا الوقت من ساعتي المظبوطة على الانهيارات والأحزان المتتالية عشان الكلام ده مهم افتكره و مهم يفضل قدامي لأطول مدة ممكنة.

أنا اكتشفت إني اتعلمت اقول كلمة ' لأ ' من فترة مش بعيدة خالص، و اتعلمت ارد بيها على كل حاجة، حتى إن كانت نفسي.

كتير بقيت بعمل الحاجة اللي عارفة كويس إني شاطرة فيها وأنكر ده طول مانا شغالة ، لحد ما ابتديت أقتنع إنه أي امباكت او فييدباك كويس فده بيكون ضرب من الحظوظ و ساعات بحسه كلام عادي ملوش أساس.

بقيت بنكر لنفسي حتى اني قادرة اتحكم فيها، فسبت كل حاجة تعوم زي ما هي عايزة - حرفيا تعوم اه -

كل حاجة بتتخبط يمين و شمال وانا عاملة زي القبطان اللي معاه خريطة و بوصلة بس مقتنع لسة انه تايه و مش هيعرف يوصل عشان مش واثق في نفسه كفاية.. فبيقرر يسيب المركب تمشي و يا توصل يا تغرق بقى هتعمل ايه. 

ده انا بالظبط دلوقتي، و الغريب اكتر هو اني اتعلمت اقول لأ لكل حاجة إلا أفكاري العكسية دي، و اتعلمت أنكر كل ما أستطيع فعله حتى لا استطيع فعله بجدية.

اكتشفت بردو اني بتبع لووب مشابه للهابيت لووب بس بالعكس، بعتمد على حدوث الريوارد الأول و بعدين يقلب ب bad impact يخليني على طول reward seeker بغض النظر استحقه ولا لأ. أبيوز يعني. 

Sighs.

دي خطوة من سلسلة خطوات ادراكية جت على مراحل الفترة اللي فاتت و تقريبا كل لغز بيفكلي لغز بعده بحاول أفهمه و افصصه بنفس الشكل ده، و غالبا بوصل بس بركنه عشان * مستسهلة *

اتمنى اخد الخطوة دي يمكن الاقي مفاتيح مختلفة للغز اللي بعدها، نأمل هذا.