منفذ بيع السلع المعمرة

ياللي بتسأل عن الحياة، انا شوفت واحد جاي من عندها هناك كدة.

الحياة عبارة عن منفذ بالظبط زي منافذ بيع السلع التموينية.
كل واحد فينا جه الدنيا ومعاه بعد ولادته مباشرة بطاقته اللي بيورد و ياخد بيها أحداث حياته سنة بسنة.
فيه اوقات ممكن تروح و تكتفي باللي معاك و تكمل بيه للسنة اللي بعدها، أو تاخد فوق اللي معاك، أو تبدله خالص و تاخد حاجة جديدة تماما تتعامل معاها، أو تبقى مغفل - معلش بقى لو كنت مغفل بس انا كمان كدة - فتقرر تخلي اللي معاك، بس إيه بقى تاخد زيادة و زيادة على الزيادة، و تفضل تشيل فوق طاقتك لحد ما الكيس يتقطع منك وانت مروح و ده حوار لوحده، متخيل معاك حاجة مش عارف تلمها من قبل ما تروح حتى؟
الجديد في حاجة زي دي إنه محدش هيقدر يشيل معاك ولا يساعدك، الحاجات دي لما بتقع على الأرض بتلاقي الناس بتجري منها و تخاف، كأنك رميت حاجات قابلة للانفجار في وش اي حد إلا انت.

انت الوحيد اللي تقدر تتحملها و تتعامل معاها، انت الوحيد اللي تقدر تكتب كلمة سرها صح، أو غلط.. بس مش غلط قاتل.

ساعات بتلوم نفسك انك أخدت كل ده، و تقرر تروح السنة الجاية و تنقي كويس انت عايز ايه، مينفعش اخد حاجات كويسة بس يا ريس؟
لا يا سيدي ده اجباري لازم تاخد قصاد كل حاجة عكسها، مش هينفع طيب هتمشي بكفة و كفة؟
حتى يبقى حرام، و بسرعة بقى يا استاذة عشان الطابور طويل و الشغل النهاردة لحد اخر اليوم و الواحد مش طايق نفسه.
تلم حاجتك و تمشي و انت فاكر انك الوحيد اللي اترفض طلبه، غالبا مش هتقدر تشوف الناس اللي واخده حاجات اتقل منك بكتير، غالبا مش هتساعد حد كيسه وقع منه في الشارع، هتقوله كلمتين كويسين و هيصعب عليك.. لكن مش هتعرف تشيل عنه ابدا.
تشيل ولا تموت؟ اختيار صعب على ابن آدم بوجه عام.

ايه اللي بقوله ده؟ معنديش فكرة
جود ناييت