دليلك للهروب من المراهقة

اهلا وسهلا بيكم أعزائي المراهقين والمراهقات من مختلف الأعمار 

طبعًا تسمياتي ملهاش أي صلة بالمحتوى ولكن يمكن ده يكون قريب شوية.

فيه حاجة كدة اتعلمتها متأخر شوية بردو فحبيت أشارك بيها عشان ليه لأ. 

دايما في التعامل بالذات مع فئتنا العمرية وما حولها ساعات بتلاقي ناس طول الوقت بتحاول تبقى nice to you لدرجة ممكن تخليك شاكك ومش عارف هما عند أنهي نقطة في العلاقة معاك، هل انتوا صحاب، هل صحاب مقربين، هل معارف عادي وهم بس بيحاولوا يكونوا كيوت؟

أنا كنت الشخصية دي، أقصد اللي بيحاول يبقى سلس طول الوقت، لا لشئ لكن لاني برتاح كدة و بحس انك تكون فاميليار مع الناس احسن ما تحط وش خشب، ولا أنكر ابدا انه ده حطني في مآزق كتير، فاهم انك تبقى كل تصرفاتك كويسة لمجرد انك عايز تكون كويس مع الناس ولكن على الجانب الآخر فيه ناس هتفسرها بشكل تاني.. طبعا ده كله كان محكوم اني معرفش الليميت بتاعي من ال being nice scale أو نسميه  النايسوميتر

خلينا نقول من الآخر ازاي تبقى nice to people وفي الوقت نفسه لا تبدو ك " س س ر" في نفسك لو بنت، أو حكاك أو شخص مبالغ فيه لو ولد؟ 

دايمًا لازم يكون فيه حد فاصل لل being nice، المراهقة مش بالسن، و المراهقة مش شتيمة يعني كلنا عندنا نسبة منها وانا اعتقد إنها مابتنتهيش بانتهاء فترة عمرية خالص.. للأسف ..

بس الفكرة بقى انه احيانا مش بنكون على معرفة كافية بالشخص اللي قدامنا علشان نعرف ازاي تكون الطريقة المثلى للتعامل معاه بدون ما يفتكر اننا اجدع صحاب صحابي من صغري - ويكون صديق عابر - أو أنه انت شريكه المستقبلي وسجلت اسامي عيالك في المدرسة وهي اصلا من الاول ورطة للمشاعر ومحاولة لجعل الحياة ألطف.. لا أكثر ولا أقل. 

في سياق آخر انا برتاح اوي لل animator، بحبه وبحسه بليغ اكتر من الكلام ده كله، فكان نفسي اصورلكم اللي في دماغي بالظبط عن ازاي المشاعر بتشتغل قصاد الشخص اللي بيعاملنا حلو ده و ازاي تحجمها و تحطها عند حدها. 

خلونا نتفق اني مبعرفش ارسم من دماغي والحاجة بتطلع زي ديناصور كروم مهما كان ١٠٨٠ في دماغي فااا هير وي جو 

طبعًا نحط في الاعتبار انه الشخص اللي فوق ده عنده نسبة مش قليلة من المراهقة، وانت مش عارف ده فعليا .. دي كل المشكلة انه بيفتكرك مخصصه بده، مخصصه بالاهتمام، الكلام اللطيف، وعلى فكرة بيتخضوا اوي لو بان العكس بعد فترة  

بيعتبروك كأنك عشتمتهم وخنتهم وحتى لو فاهمين فكرته ف مشاعرهم مش هتفهم ده و هتفضل تسب و تلعن اليوم اللي شافوك فيه. 

ايه الحل بقى يا شباب؟ 

لا بصراحة أنا مش عارفة حل جذري، الفكرة كلها اني حاولت مبقاش مدلوقة بشكل مبالغ فيه و أحاول ماهتمش اهتمام بالغ لمجرد اني ابقى nice to others ، ممكن أبين اهتمامي اللحظي لكن مش بنفس الشكل اللي متعودة عليه.. انا فصلت خلاص دماغي كلها راحت في الانيميشن ده ودلوقتي مش عارفة اكمل اقول ايه. 

بس لووو يعني حد بيقرا ده، الكومنتس سيكشن موجود لو فيه حل 

مبسوطة اني كتبت الكلام ده عشان كان محشور في مكان ما في دماغي بقالي مدة كبيرة، اه طالع مش منظم بس طلع 🙆🏻‍♀️