حاجة لسة طازة حالاً | مفيش عنوان
العيوووب.
الشغل الشاغل للبني آدم منذ بدء الخليقة هي العيوب، هكتب بالعامية مش العربي الفصحى عشان هنا هيكون فيها " عيب" إنها مش هتوصل اللي عايزاه بسهولة.
طول عمرنا مابنحبش حد يعيّب علينا أي يطلع في حاجة بنعملها أو فينا عيب، بس عشان مبنبقبلش العيبة لحد، فا عيب أوي يعني لما حد ييجي يقولنا كدة في وشنا.
لما بنجيب حاجة جديدة مش بنهتم و نركز أوي مع المميزات قد العيوب، و ده لأننا دماغنا معيوبة بالأصل، لما تكون جايب حاجة انت عارف كويس إنها مُضرة عند نقطة معينة مابتروحش تكتب على جوجل " عيوب الكريب كرسبي مع البيبسي و سلطة الكول سلو" و لكن بتكتب " فوائد الدجاج المقلي الجاهز للذاكرة و البشرة أو ٥ فوائد لليوم الفريي"
و بالفعل هتلاقي ناس كتير تخدم الفكرة و ترفعلك مستوى الثقة و تقليل الشعور بالذنب وانت بتاكل الهباب ده.
لا يسطا متعملش كدة قصاد الناس عشان عيب، بس لو لوحدك أو مع صحابك عادي اشطا، المهم محدش يجيب عليك عيبة.
مش هنجيب لبس فيه حاجة منتوشة - نتش أي قطع خفيف في نسيج القماش قد يكون غير ظاهر لكن بنشوفه لحسن الحظ و نضيع على صاحب المحل قطعة فيها مكسب -
أكيد يا فندم ده عيب مصنع!، متأسف أنا مش مضطر أقبل حاجة معيوبة.
متأكد إنك بتحبني؟ طب و عيوبي؟
أنا متأكدة إني مستاهلش كل ده، ده فيا عيوب الدنيا
العيب لو جه من صاحب العيب ميبقاش عيب بس لو جه مني هبقى صاحب العيب، فمنطقيا مش هيكون فيه عيب؟
العيب أقوى، العيب قادر، العيب بياكل دماغنا و بيخلينا نهرب من نفسنا ساعات عشان شايفينه و حاسينه ،ملوش وجود مادي بس إيه.. نينچا ، العيب أهم من الصح و الغلط و القواعد و القيود و أهم منك انت شخصيًا
قوم قوم شوف إيه فوايد المرقعة لصحة الدماغ، صحتك بالدنيا
.png)
Comments
Post a Comment