جبروت امرأة

ده أول بوست من فترة طويلة جدًا في المكان ده، و اللي غالبًا طول الفترة اللي فاتت حاولت أبدله بحاجات كتير حتى مجرد إني أتكلم مع الناس، و للأسف معرفتش.
هحاول أرجع أكتب بس أكتب الحقيقة كلها .. اتعودت طول مانا بكتب أي حاجة ممكن حد يشوفها تحت أي ظرف إني أراعي الإنسيكيوريتيز اللي عندي بشكل أو بآخر.

اتعودت إني ممكن أكتب كل حاجة حاساها بس أسيب جزء لنفسي لو حاسة إنه ممكن يأثر في حد، مع إني عارفة إنه مش هيبقى بالشكل اللي متخيلاه ده.

الفترة التي فاتت تقريبا كان أكتر حاجة بفكر فيها هو إزاي ممكن فعلاً أكون مقدرش أساعد أي حد، ازاي في أحيان كتير بقنع نفسي إني بلاقي حلول مع إني في الحقيقة عاجزة جدًا عن إني أسبب فرق لحد.

حطيت نفسي في مواقف مباشرة علشان أعرف ازاي هتصرف مع فكرة إني مش هدي حل نهائي، كل الكلام مسكنات كل التفهم و كل الردود ضد الأفكار مسكنات.

المشاركة في حد ذاتها بنسعى ليها لمجرد إننا نحسس نفسنا إنه فيها الحل ، و ساعات ممكن نلاقيها حل ، بس جزء صغير أوي و مش جذري.

كل حاجة بنشارك او نساعد فيها بتبقى عارفين بنسبة كبيرة إننا عبارة عن وسائل لبلوغ غاية حتى لو كانت الغاية دي قريبة و مش بتاخد وقت و نضطر نجددها تاني.

قريت جملة قبل كدة you can't help people, but you only can love them.