Tiktok, your turn...

الموضوع هيكون سخيف كمناقشة أكيد ، فقلت إني لازم اكتب اللي في بالي ده حالا لأني بحتاج كل فترة افتكر الإحساس ده.

أنا بخاف من الموت جدا .. مش لنفسي لأني ساعتها هتحاسب عاللي عملته و خلاص كدة مش هيبقى في أي احساس مادي ازعل عليه ، مش هيبقى غير بس الحاجات السيئة اللي لو محالفنيش الحظ و عدّلتها هخسر.
بخاف عاللي حواليا جدا، بخاف إني أفقد حد فجأة من غير سبب من غير أي مقدمات ، و حتى لو في مقدمات والله بتبقى مشكلة كبيرة.

الموضوع بائس جدا وانا حقيقي بكره أتكلم فيه و بتجنبه ، هو مش تابووه لأ، هو شبح بحس بيطاردني.
كل ما اخلص منه ييجي من أي حتة بأي شكل قريب بعيد مش مهم .. المهم إنه موجود في كل مكان و كل شوية بيقوللي بصي اديكي فلتتي المرادي ، بس مش على طول فخدي بالك.

لحسن الحظ إنه مش حاجة مستمرة معايا أو موجودة بشكل قهري ، هي بس عاملة زي جرح كدة كل ما حد يقرب منه بيضايقني .. بيضايقني جدا و بحس إني لسة قدامي حاجات كتير جدا لحد ما أوصل إني أبقى مستعدة في أي وقت.

ناس كتير بتموت بكل شكل ممكن و مفيش حاجة بعيدة ، بس طول ما المسافة بتقل بترعب و بعدين تزيد تاني عشان تساعدني اتناسى اللي حصل و اشتغل تاني عادي ولا كأن في حاجة، لحد الخضة الجاية..
حتى بخاف اجيب السيرة والله بخاف جدا.

بدعي والله إنه يا رب يا رب ماموتش غير و ربنا راضي حتى لو موصلتش للصلاح الكامل ، و يا رب أموت قبل أي حد أعرفه أو أي حد اموت كل يوم بعده.

احفظهم يا رب و احميهم و ارحمنا كلنا برحمتك يا رب