ليه؟

كنت فكرت ف الموضوع ده من فترة طويلة ،  و كل شوية بييجي ف دماغي و أنساه.. 

      * الموضوع هيخلص قبل ما تخلّصوا التراك ده و جايز يكون مش مناسب ليه أساساً  ،  بس اسمعوه حتى لما تخلصوا قراية عادي  * 

نفسي أعرف أصل الحاجات اللي ف دماغنا دي ،  يعني الأفكار و الذكريات و الحاجات اللي بننساها و بنفتكرها بيبقى بسبب إيه  ،  حاولت ف يوم أتخيلها مادية ،  هل فعلاً لو مسكت مخ بني آدم و فتحته هلاقي حاجة غير أوعية دم و أعصاب؟ ،  هل هلاقي أفكاره و هلاقي مقدار ذكائه مثلاً أو هلاقي دماغه متقسمة ملفات و كدة؟ 

شوفت brain dissection يوماً من الأيام و للأسف طلع زيه زي أي حاجة ف الجسم ،  بيتقطع و حاجة لزجة كدة و مفهوش من جوة حاجة.. 

هو العقل ده فين؟ ،  و عملية " التفكير"  إيه اللي بيخليها تفرق من حد للتاني ،  الموضوع متحكم فيه إيه أصلاً ،  و ممكن لو عرفنا الحاجات المتحكمة دي نخلي كل الناس تفكر بطريقة واحدة؟.. 

و لو مادية فعلاً مش ممكن نعمل بنك نجمع فيه كل الحاجات دي؟ 

ليه مش بنشوف الحاجات بنفس النظرة ،  مش كلها عيون واحدة و مخ واحد؟ ،  طبعاً الموضوع هيبقى ممل لو كان كله " نفس الحاجة"  ،  بس الفكرة إني عايزة افهم العملية نفسها بتتم ازاي و مفيش حاجة مادية تتشاف. 

غالباً هفضل أسأل نفسي لحد مازهق و أنسى و أجي بعدها بفترة أفتكر و أعيد نفس الكلام .. 

خليه مكتوب هنا أحسن.