¡!

مش عارفة ليه دايماً التفاصيل مبتبقاش واضحة ف الأول  ،  لازم يكون في شغف و محاولات مستمرة لإننا نوصل لأصل و جمال الحاجة  اللي بنلمحها لأول مرة و يبهرنا بريقها جدا  ،  منها البعض بيروح و منها اللي بيفضل يلمع و يزيد لدرجة توصلك للاعتقاد إن الشئ ده هيفضل يبهرك طول حياتك أو حياته ..

ليه المكتب قعدته غلسة أوي كدة مع إن إزازه حلو أوي إنه تترسم بلدة كاملة عليه  ،  و ليه النجف الكريستال بيبقى شكله جميل جدا جدا من بعيد لكن لما تقرب منه هتلاقيه كله عبارة عن كريستالات صغيرة و الواحدة منهم لوحدها لا تبدو بنفس جمال الوِحدة بتاعتهم ..
ليه السلالم طويلة..  و الشوارع بتتغير لكن كإن لكل واحد فيها طابع و إحساس خاص بيه ،  ليه بحس بريحة البحر وقت مافتكر الفجر عليه وليه البحر الأحمر مقرف اوي كدة على أول الشط و ممكن يوصل إنه يعورك  بس لما بتدخل لجوه بتبقى الأمور أسهل و أحلى و أكثر نقاءً ..
ليه تبقى ف منتهى السعادة بسبب تفصيلة معينة ثم العكس تماماً ف التفصيلة اللي وراها ..

ليه أصلاً عندنا تفاصيل؟ ،  السطحيات لا تؤهل للحياة بوجه عام ،  و كل ما التفاصيل تزيد كل ماتحس إن اللي كنت فاكره بازل  ملوش حل  بتلاقي الأجزاء الواقعة منه شوية بشوية ..

المغامرة ف التفاصيل ممتعة.. و مرهقة جدا  ،  كل الأفكار و الألوان و الكريستالات الملونة و الشخصيات و التجدد و"  ثامّة أو ثلمي " اللي كل أطفال العيلة بيبدأوا بيها و بيتمثل تطورهم عندي انهم بيقدروا ينطقوا حروف اكتر و احسن...
و الأماكن القديمة و الشوارع الزحمة و الأباجورة اللي بتفضل محافظة على هيكلها حتى لو نورها خلص ،  و بيبقى شكلها مش مؤذي ف حالة همودها لحد ما ايد حد فينا تساعدها انها تنور تاني  و كل التفاصيل اللي بنرفضها و بنحاول نغيرها أو بنسيبها لأنها أصل من أصول عنصر التفكير ف التغيير مثلاً ،  أو لأن الحياة لا يمكن أن تكون بهذا العدل لكل تلك التفاصيل يعني ..

التفاصيل التايهة و التافهة ف دماغي حالياً و الحاجات المشوشة دي كلها ،  تفاصيل ملهاش لازمة بس بحاول أجمعها ،  يمكن يكون وقت تكملتها لسه مجاش ،  عشان  من قواعد التفاصيل إنك تحدد ،  و وماتستعجلش..