Nothing 5

الحقيقة مش قادرة ألاقي أي سبب يبرر إني بكتب الكلام ده غير التأريخ لبداية عدد من السنين أتمنى يخلصوا بأسرع ما يمكن  و غير البؤس ..

بقالي فترة لما كانت الناس تسألني إيه سبب عدم حبك للكلية؟ ،  هو الحقيقة أنا عمري ماحبيت و تقريباً عمري ما هحب المرحلة الجامعية ككل  فخلينا متفقين على ده  ،  إنما الكلية بشكل خاص فكان عندي عدد من الردود -  المقنعة جداً بالنسبالي و الغير مقنعة لأي حد من اللي حواليا  -  ،
النهاردة أحب أقول إنه زاد عليهم سبب كمان ،  أو سببين ،  أو هما كام سبب ف بعض يعني..

أنا بكره النفاق و المراء و الفهلوة و التلفيق  تحت مسمى " الروتين"  ،  و بكره الناس اللي بتعمل كدة أو بتبررله تحت أي مسمى بالنسبالهم  ،  ف النهاية بعتبر إنك لو اتعودت  من البداية على انك تكون منافق أو بتلفق أي حاجة هتفضل كدة و هتبقى عادة تتمكن منك مش هتعرف تخلص منها ،  و مش هتقتصر بعد كدة على تجربة أو على حل سؤال أو على أي هبل من ده ،  ممكن توصل بعد كدة لاستهتار بأرواح ناس و حاجات بشعة التخيّل أصلاً ..

أنا مبحبش الطب بس الغريب إني مش كارهة وجودي فيه -  أو حُسباني عليه -  قد ما كارهة النظام نفسه ،  أنا بكره البلد كلها و نظامها و حُكّامها القدام و الجداد  ،  و بكره أفرع الشجرة دي من اول الوزرا لحد ما توصل لأصغر معيد ف النظام ده ..  كل حاجة غلط ف غلط و كله متعايش مع الغلط بطريقة تحسسك إن ده هو الصح  ،  منطقة تبرير  بتبلعنا كلنا  ،  متهيألي أنا مش هحب وجودي ف المستشفى مثلاً  ،  مش هحب إني أتحط ف موقف فاصل ف حياة روح زيي زيها و بكل استهتار  اعمل فيه حاجة غلط بأي حال  ،  مش هقدر أقبل إني الفق تشخيص أو آخد حاجة بالشبه عشان المدير مش عايز مشاكل ولا عشان الشغل يمشي ولا عشان في ناس كتير مستنية ولا عشان أي مبرر ف الدنيا  ،  و ف اعتقادي إن الفكرة دي ممكن ماتتغيرش لفترة كبيرة من الزمن ..

بس الخوف الحقيقي إنها تتغير للأسوأ  ،   اني أوصل للامبالاة اللي تخليني أقبل بأي حاجة لمجرد إن الحياة تمشي ،  أو اللي تخليني أخضع لنظام بايظ من أوله لآخره بس لمجرد إنه مش انا اللي هغير حاجة

حاجة كمان؟ ،  انا بكره إحساس العجز ،  و الأمر الواقع ،  و الحاجات الكتير المتعلقة بالنهاية الواحدة لكل الناس اللي ماشية ف نفس طريقهم دول

مش مثالية أو محاولة حتى للمثالية ،  بس يمكن اعتبرها حاجة تفكرني بإيه السبب اللي وصلني للمرحلة اللي هكون عليها  ،  بعد كام سنة من دلوقتي  مثلاً ..

حسبي الله ونعم الوكيل في الل وصلنا للنقطة دي أيا كان مين ،  ربنا مايسامحك على كل الل عملته فينا  ،  أو على اللي عملناه ف نفسنا !

* عصبية ف خمس دقايق  كان لازم تطلع و هرجع أخف إن شاء الله ._. *