Nothing (5)

..

- تاني و تالت  -

This post is nonsense but this nonsense should be written ...

أنا نفسي جدا أرجع لأيام المدرسة تاني  ،  كرهت الجامعة و الحصار الل عاملاهولي الجامعة و كرهت كل حاجة.. 

على الأقل أيام المدرسة كنت بعمل كل حاجة ،  تقريباً في حاجات دلوقتي كرهتها كنت بعملها زمان عادي  ، الجامعة دي أكتر حاجة بشعة ممكن تحصل لحد بكل تفاصيلها 

مش عارفة إيه الحل ،  التجنب ولا التعايش ؟ ،  مبقيتش عارفة أحدد فعلاً إيه الل بيحصل  ،  نفسي بس الكام سنة الجايين دول يخلصوا بأسرع ما يمكن و بأي طريقة.. 

من سنة فاتت أنا مكنتش كدة و تقريباً مش هعرف أرجع تاني بنفس النظام ،  مش هعمل الحاجة مجرد ما احب اعملها و أفضل أحسب يمين و شمال لحد ما مفيش حاجة ف دماغي تتنفذ و أفضل واقفة مكاني مابتحركش  .. 

مبحبش اقول كلمة باكره دي على أي حاجة او اي حد ،  بس فعلاً انا بكره الجامعة  و اللي فيها ..

وحشوني البنات و حصص الألعاب و البهدلة ف الملعب  و التنطيط و التزيين و كل التفاهات الل كنا بنعملها ،  و التصوير ف المناظر الخلابة الل ف المدرسة و مناظرنا و الغنا ع السلم  و معلش يا مستر أصل كنا بنملا مية  وندخل ف نص الحصة و النقاشات الل بتبدأ من السياسة و توصل لخناقات اهلي ولا زمالك و احنا اصلا مابنحبش الكورة ولما كانوا بياخدوا الأجندة عشان يقروا الل فيها و يتريقوا عليا لما اتكلم ف السياسة و لما كانت مديرة الدور المادة الخام للتريقة ف كل سنة  -  انا آسفة والله ده شكله ذنب بيتردلي دلوقتي -  و  حاجات كتير زي دي 

مفيش أي حاجة تقدر ترجعني لأيام المدرسة تاني  ولا الناس الل بحبها فعلاً و بشاركها أي حاجة سواء كانت عاقلة أو حتى غير معقولة،  ولا المسافات الل اتحطت ما بيننا  غصب عننا بحكم الدراسة أو الغربة ف اغلب الأحيان

مش فاهمة ليه المفروض نكبر و نبعد و مابنعرفش ننسى 

و معرفش مين الل كان بيقول دي احلي سنين عمرنا ،  أمال أوحشها هيكون ازاي؟ 

يا جامعة انا بكرهك ،  شكراً ليكي على أسوأ كام سنة هيعدوا عليا ف حياتي  ._.