...

مساء الخيير ، 
  البوست ده مليان عصبية و نيجاتيف انيرجي ،  فبلاش يتقري أساساً أنا عايزة أكتبه بس..
Skip >> skip >> skip
.
.
.
.
.
.


بعيداً عن حوار إننا ال 140 على مستوى العالم ف التعليم و الكلام ده كله ،  احنا بنعيش مأساة حقيقية ،  من ساعة ما خلّصت السنة الل فاتت و أصحابي الأصغر مني و داخلين ثانوية عامة كانت أسئلتهم المعتادة عن طبيعة السنة و نعمل إيه و نسوّي إيه ،  و بيخافوا و يستغربوا لما أقولهم إنه عادي جداً سنة عادية و مش ضروري تحطوا نفسكم تحت ضغط نفسي و تمشوا ورا كل حاجة -  متخلفة -  بتتعمل ف السنة دي بالذات ..

أنا بكره المينستريم الل بيقول إن السنة دي لازم تاخد فيها عند كل الناس ف كل مادة أيا كان ،  بكره الل سبّب انتشار الوباء ده من غير ماعرفه أصلاً  ،  البعبع الل بيشتغل طول السنة ،  اتعب دلوقتي و ارتاح ف الكلية ،  ذاكر ذاكر ذاكر و ماتعملش أي حاجة تاني ف حياتك ،  احبس نفسك ،  معلش السنة دي بس ،  شوف مين بياخد فين و خد ،  ماتبقاش أقل من حد ،  عيش حمار ،  اقبل إنك تبقي حمار عالأقل السنادي ،  شك ف كل الل حواليك ،  معلش سنة و هتعدي ..

أقسم بالله لو الناس بطلت تتكلم هتعدي عادي جداً ،  و الطلبة و أولياء الأمور هيعيشوا عادي جداً  ،  و لو في تعليم محترم و مدرس يحترم إن الل قدامه ده مسئوليته هتعدي عادي جداً ..

تعبت من كتر تكرار الكلام ده للناس الل داخلة جديد ،  محدش كان بيصدق إن تجربتي الشخصية للسنة دي كانت بسيطة ،  مفهاش أشكال التعقيد و اروح للمدرس الفلاني عشان بيشرح النقطة دي كويس و العلاني عشان بيشرح النقطة الل ورا النقطة دي كويسة ،  وده مدرس -  ولو أن النوعية دي منهم ماتستاهلش اللقب  -  بيشتم و يقل أدبه و يحرج و يبهدل و و  و ،  بس معلش نستحمل عشان شرحه كويس  ،  و معلش نزور ورق عشان ناخد أجازة من المدرسة و مانبقاش منازل ،  و معلش الجهاز الإداري كله عارف إن كله تزوير بس اشطا عادي ما السنين الل فاتت كانت ماشية كدة ...

أولياء الأمور يحبسوا عيالهم ،  من الدرس للبيت و من البيت للدرس ،  العيال تتحول ف خلال تلات شهور لصور ممسوخة ،  شكلهم يحزن والله ،  يبتدوا يحسسوا من الكلام ،  تايهين ،  محدش عارف فين الصح و فين الغلط و محدش عنده اعتماد على نفسه ،  أنا عايز المعلومة أشربها شرب عشان أرميها ف الامتحان ،  ما كدة كدة أصلاً أنا مش مستفيد ،  نظام تعليمي غبي و معقد  و متخلف  ..

اجي بعد كده ألاقي نفسي باتعامل مع شخصيات صعب جدا تعرف عاشوا سنين عمرهم الل فاتت مع الناس ازاي ،  حرفياً مايعرفوش ف حياتهم إلا كتاب الوزارة و كل ما هو ذا صلة ..

معلش نحبسهم سنة عشان ده يطلع دكتور و ده مهندس و ده طيار ،  بغض النظر أصلا عن إن سنة من الضغط المستمر ممكن تعمل مريض نفسي بمرض محترم متكامل ،  شخص معندوش أي أمل ف الحياة لسنة قدام و كل الل شايفه سواد ،  وطول الوقت بيشتكي بس مش عارف من إيه..

أقسم بالله السنة الل فاتت كانت في ناس بتقولي أفكار عظيمة جداً و مهارات حلوة عايزة تتعلمها و في ناس كانت عايزة تخس  * من ضمن الطموحات العظيمة يعني *  بس كل ده كان مؤجل ل " بعد الامتحانات بقى " ..

ماشي السنة مهمة ،  ماشي المفروض اجيب مجموع محترم ،  ماشي ماشي ده كله ،  طب ما هي سنة بردو زي كل سنة ،  لأ يمكن أسهل من كل سنة .. 

الكلام ده محدش بيفهمه للأسف غير الل عاش التجربة ،  و بيحاول يعيّشها لأجيال بعده من " التايهين" !   ،  ساعات بينجح إنه يجنّبهم غلطاته  ، و ساعات بيفشل قصاد مجتمع كبير جداً بيضغط من الناحية التانية بالإحباط و الاكتئاب ..

أنا فاكرة إن السنة الل فاتت فعلاً أخدت آخر شهر ده باسهر لحد الفجر اذاكر  * و انا مخلصة أساساً * بس باعيط ،  كل يوم الفجر  ،  كنت كل يوم أفتح الجرايد يجيلي إحباط ،  و مانشيتات كبيرة جداً بالأحمر بتهدد و تحذر من وحش الثانوية العامة الل هييجي ياكل الناس كلها بأولياء أمورهم  ،  مكنتش خايفة من المذاكرة قد خوفي من صدمة الامتحان بعد جرعات إحباط مكثفة ،  كنت مغفلة جداً

ثانوية عامة مش بعبع ،  و الحبسة ملهاش أي فايدة ،  و كلام الناس و المدرسين والجرايد و اصحابك مالوش أي تلاتين لازمة من الأساس ،  و الل بياخد كل الدروس مش ذكي ،  و العكس صحيح ...

كفاية يا جماعة معافرة ف سكة غلط ،  كفاية مسايرة للغباء ،  كفاية توقيف للدماغ و كفاية تخلف..

طول ما الوزارة دي والبلد دي ماشية بنفس النظام أقسم بالله هننتهي أبشع نهاية ممكن حد يتخيلها ،  و مش هنقدر نعترض على أي تدهور يحصل بعد كدة ،  لإن إحنا المذنبين ،  إحنا السبب..

الرحمة !

* بوست تاني كنت حكيت فيه على حوار الغياب ال 10% و إجبار الطلبة ع الحضور  بالرغم من " غـــــبــــــــاء"  مستوى التعليم عموماً :3  ، 18 أغسطس 2015   *

دلوقتي الوزير طلّع قرار انه خلاص في 10 درجات للحضور رسمياً :
عموماً يا جماعة الموضوع ده مش جديد و لا حاجة و قعدوا يخوّفوا الناس بيه من فترات كبيرة  و مكانش رسمي لكن الناس كانت بتخاف ،  دلوقتي مفيش أي حاجة جديدة غير أنه بس خلّي بينكم و بينه نشرة رسمية 
و عن تجربة شخصية مش هتخسروا أي حاجة لما تروحوا المدرسة عادي في حالة وجود مدرسين كويسين..

ما علينا يعني،  لازم نعترف بحاجة -  أو حاجات -  مهمة ،  مستوى التعليم مش واحد ف كل المدارس و لا مستوى المدرسين و لا كل المدارس بتهتم أصلاً بوجود فصول لطلبة سنة تالتة - ده فعلاً يا جماعة - 
و غير كده ،  احنا السنة دي الناس الل كانت عايزة تفضل منتظمة عشان ماتتعكش مع الحكومة و ورقها زي المنازل  كانت بتجيب شهادات مرضية فكسانة و القائمين على الوزارة من أكبر راس لأصغرها عارفين انها فكسانة بس بيعدّوها من منطلق " العادي"  و " سيبوهم يعيشوا دول تعبانين" 

الموضوع مستفز جدًا جدًا يعني بس أهو ،  ده معناه إيه ببساطة؟  ،  معناه معاك فلوس و معاك واسطة انت مش مضطر تشيل هم المدرسة أصلاً ،  يابني دانت معاك الدنيا كده!

ده ف حد ذاته أكبر ظلم ممكن يتحاسب عليه كل بني آدم منهم ،  ظلم بكل المقاييس و الكلام مفسّر نفسه

* حوار ال 1000 جنيه إعادة قيد ده معناه الحرفي  " مش عايزين تغيبوا ؟  طب ادفعوا و نفّعونا بقى هاهاهاه" 
تقول اشمعني على ناس و ناس لأ ،  ما هو الناس ال "لأ"  دول بيدفعوا الل فيه النصيب بردو يا حبيبي و الله

المناهج  وصلت من العقم انها بقت غير صالحة كمعلومات صحيحة حتى ،  حتى مع التجديد مش نافعة ، 
الدروس الخصوصية مابقتش بديل ،  دى بقت الأساس يا جماعة و الله ،  و ف كل المراحل التعليمية 

الموضوع يبشّر بمستقبل أكثر اسودادًا من الل احنا فيه ده  و بإذن الله هنلعن نفسنا و حظنا و سكوتنا كتير جداً الفترة الجاية
و احنا أغبياء بالقدر الكافي اننا نحط ناس غير مناسبة ف مكان غير مناسب  و  بالقدر الكافي اننا نقعد نعيّط على حظنا و ف الآخر ننقاد للبحر الل مش عارفين هيوصل بينا لفين ،  فين دي الل هي أكيد حتة مش لطيفة أبدًا من قاع التاريخ 
شكراً لوقتكم ،  خليكم فاكرين بس