جبروت امرأة

زمان أيام أولى ابتدائي كان معايا ف المدرسة كلها كام سلمي معدودين ع الصوابع ،  لما حوّلت ف سنة تانية لقيت إن مفيش أي سلمات ف المدرسة كلها بكل السنين غيري ،  من هنا بدأ الاقتناع إن أي سلمي هي أنا بس ،  و إن الاسم خلاص بقى مقصور عليا ،  و امتد الحوار ده للحاجات بتاعتي ،  كنت ف الفترة دي معتبرة إن أي حاجة بتاعتي لا يحق لأي حد إنه يبقى معاه زيها  ،  لدرجة إني ف مرة دبيت خناقة مع واحدة جديدة ف سنة تالتة  لمجرد ان شنطتها كانت شبه شنطتي  * شبهها بس *   -  و البنت دي حالياً من الأقلاء الأعزاء جداً على قلبي الل طلعت بيهم من ابتدائي لحد دلوقتي :D

مرة تانية ف سنة رابعة أو خامسة ابتدائي ،  كانت بداية تعرفي ع النت لما عملنا وصلة النت لأول مرة ف البيت  ،  و كان شكل الياهو ميل الل بيظهر كل مافتح الكمبيوتر بيستفزني جدا ،  عرفت بعد كدة إنه معمول عشان الناس تتكلم عليه و معرفش إيه و اتفرجت و الحوار عجبني أوي ،  قمت من غير ما قول لحد لعبت فيه و عملت ايميل و كتبت الباسوورد بعد ما ترجمت انها " كلمة المرور"  مفهمتش إيه كلمة المرور دي بس طالما طالبها تبقى حاجة مهمة اكيد :D

خلصت و عملته و جه دور إني ادور على ناس اكلمها ع الميل ده ،  روحت المدرسة تاني يوم و قعدت أسأل البنات مين فيكم عامل ياهو ميل يا جماعة عشان نتكلم ع النت زي الكبار :''D ،  أمنية قالتلي أنا لسه أخويا عاملّي واحد جديد من قريب بردو ،  قلتلها -  بكل صدق و حماسة -  خلاص هاتي الايميل و الباسوورد عشان اعرف اكلمك ،  لا و ادتني الاتنين فعلاً :'''D

اول ما روحت البيت يومها جربت ابعتلها ،  ازاي؟  ،  طلعت من بتاعي و كتبت بتوعها ،  في حاجة غلط ف الباسوورد ،  اتصلت بيها قالتلي إنها متأكدة منه  ،  و قالتلي خلاص هاسأل اخويا و  اشوف  ،   بعدها بفترة أدركت كم الغباء الل عملته  ،  و مش عارفة اعتذرلها ازاي لحد دلوقتي ع الل عملته ف دماغها ده :''''''D

سنة خامسة بقى كان أول موبايل ،  نوكيا 1110  الجبار  ،  هاسيبه ف امان الله ؟ ،  لأ ازاي ،  قعدت اكتب حاجات كتير اوي ف رموز ال pin لحد ما قفلت الخط  ،  و بعدها رحت عاملة معلّقة اعتذارات عشان اقول لجدو اني بوظت الموبايل غصب عني معلش ،  مع إن الخط لو اتشال كدة خلصت ،  و تقريباً ساعتها خدوني على قد عقلي و  شالوا الخط و سابوني كدة مقتنعة اني بوظت الموبايل كله :D

 إن الواحد يكبر دي نعمة كبيرة جداً والله :''''D