~.~

الحقيقة كنت فكرت ف الحوار ده كتير ،  ساعات بحس إننا صغيرين اوي ،  18 سنة دي بحسها قليلة جدا و كتيرة جدا  ،  عشنا أحداث بالهبل و عرفنا ف فترتنا الصغيرة دي ع الأرض ناس بعدد شعر راسنا ،  في منهم الل لسه موجود معانا و بنكلمه و يكلمنا و في الل كان مجرد مرحلة بنمر بيها و خلاص..


بس الل ف بالي دايما إننا لسه صغيرين ،  لسه في حاجات بنتعلمها و لسه في حاجات بنعملها و نتريق عليها اليوم الل وراه ده إن مكانش بعدها بساعة أصلاً..

صغيرين إننا نحكم على الحياة أو على شئ أو شخص ،  صغيرين إننا نتحكم ،  صغيرين على كل حاجة ،  و ف نفس الوقت كبار وسط الصغيرين الل زينا ،  كل يوم بنوزع قرارت يمين و شمال ،  و نتحط  قدام اختيارات ،  و نحدد انطباع و نتريق على نص الحاجات الل بنعملها دي دلوقتي ..

بحس المرحلة دي مرحلة تصحيح ،  المرحلة الل بيعرف فيها الطفل الصغير إن الجزم مش أكل و إن مش كل حاجة هتعيط عليها هجيبهالك  ،  بنبدأ نفهم أصلاً يعني ايه قرار  فا بنبتدي  نجرب الحاجة الجديدة دي ،  الله حكاية القرارات دي لطيفة اهو ،  نتلسع منها ف الأول ،  نفهم إنها " مش بتتاكل" ،  مع الوقت بنفهم.

بنبدأ نتعرف على حاجة اسمها شخصية  ،  انا هختار الشخصية الل هتعامل معاها على حسب توافقها معايا ،  انا طالع من غير شخصية فا ده  هيبان قصاد غيري من " الصغيرين"    ،  هبدأ أحس إني لازم اتغير و أجدد ،  و لازم اجرب الحاجة الجديدة " الشخصية"  و اقيس نفسي عليها.

بنعرف حاجة اسمها " رأي"

كأننا بنعيد فترة طفولتنا تاني ،  بس بنكتشف حاجات معنوية المرادي مش مادية..

و غير ده كله كتير جدا

بحس اننا كبرنا ف سن صغير  أو إننا لازم نبقى ف السن ده ف دور " الكبار"  ! ،  مش عارفة أحدد.

،  we are too young for this shit
...