لا شئ (4)

 مساء الخير  ،  الحياة دي متكلّفة جداً ، ..
لازم كل حاجة يكون ليها سبب  ولازم كل فعل يكون ليه رد فعل  ،  لازم الفعل تفكر قبله و بعده هل هو صح ،  هل هو غلط  ،  هل هو صح بس مرفوض من الناس و لا عادي بالنسبالهم ؟ ،  هل هو غلط بس عادي بيحصل و ممكن يتبرر بأي بتنجان و لا غلط خالص و خروج عن السياق؟

لازم كل يوم أفكر انا عملت إيه و اكتشف اني غلط ف حاجات كتير  ،  كل يوم مع تنقية الأفعال ممكن تلاقي تلات أو أربع أفعال غبية على مدار اليوم ،  بتكررها زي ما يكون في ترس مشروخ و انت عارف إن شرخه ده هيؤدي بعدين لإنه يتكسر و الدنيا تبوظ  ..

المشكلة إننا عارفين بس بنتناسي ،  بنتغاضي عنها على أمل إننا خلاص عرفنا الغلط و  " هـ"نصلحه  ،  بس للأسف بيفضل زي ما هو لغاية لما نبدأ نلف تاني و نفتكر إن الترس كان مشروخ ..

تتسمي روتين تتسمي طبع تتسمي اي حاجة ،  ف الآخر بتنتهي بفعل لا إرادي فقدت القدرة على السيطرة عليه و مابقيتش عارف تحدد سبب المشكلة من كتر التعود  ...

حلولي بتبقى سطحية جدا ،  آه انتي اكيد بعيدة عن ربنا  ،  انتي اكيد عملتي حاجة عشان كدة ربنا مش موفقك ف الل بتعمليه دلوقتي ،  عارفة ترجعي ازاي؟ ،  اقري قرآن  ،  اقري حتى لو دلوقتي مش فاهمة ..

من اللحظة دي انا بعترف تماماً اني مش باقرا عشان اقرا  ،  للأسف دافعي مش صحيح  ،  باقرا بتوهان  ،  أو باقرا لمجرد انه يبقى فعل كويس وسط بحر من تفاهات مش عارفة اطلع منه..  جايز يكون هروب مشروع  ،  أو عُرف !..


التشتت و عدم القدرة على التركيز و الجري ناحية ولا حاجة و البحث عن أي حاجة تبعدني عن مسئولية واجبة عليا تجاه نفسي على الأقل   هي  المسار الحالي  ،  فجوة وقعت فيها  و بلغت من الضعف أعظمه ،   بتسحبني و اكتشف ف نص الطريق!

  ،  الاستسلام واليأس مش مجرد كلمتين ممكن يتكتبوا ف الفترة دي ،  ده واقع  ،  انعدام الدافع و الشغف و انعدام الجدوى .. ،  انعدام الراحة..
عدم وجود هدف واضح أو تشتت الهدف الل كان واضح ورا ستار كبير  بيحجب كل آثار الأمل الباقي

بقيت بخاف اموت و انا مش محققة حاجة من الل ف دماغي ،  وانا مش عاملة اي تغيير ف الدايرة الصغيرة بتاعتي عشان تكمل الدايرة الكبيرة مع الدنيا كلها  ...

خايفة ف وسط البحر ده أتنسي أو أنسى !


الفترة دي فعليا زي الترس  ،  يا يمشي كويس و يعافر عشان الدايرة تكمل ،   يا يتشال عشان مايشغلش مكان مالوش فيه حق..

" I fear oblivion,fear it like the proverbial blind "man who's afraid of the dark