.... (3) :D

 هو ليه دايماً * الناس  *  فعلها أنس أو ونس؟ 


ليه ماتبقاش العكس؟

عندي مشكلة كبيرة ف التعامل مع الناس  ،  بحب أتعرّف و بحب الاجتماعيات و الحاجات الل زي دي ،  بس مش بحب الناس!
مابعرفش أتعامل  غير مع شخصيات  محددة  بأريحية  ،  و بيبان من تعاملي إذا كنت فعلاً متعودة على وجود الشخص ده و  أو مش متعودة عليه و معرفوش ..

بقيت باملّ  من وجود الناس عموماً  ،  الاجتماعيات الغير مبررة أو الزيادة بقت بتوترني  و تخليني أهرب منها بأي حجة..

ساعات كنت بتخيل نفسي ماشية بفقاعة كبيرة أوي   باتعامل من جواها  ،  و ناس  معدودة معاها نفس الفقاعة بتاعتي هي بس الل بكلمها باستفاضة و ماعرفش املّ منها  ،  إنما كل الل بره  الفقاعة دي مضطرة -  بسبب وجودي ف الحياة  -  إني أعرفهم  و يعرفوني ..

الفقاعة دي كل شوية بتكبر و بتصغر  على حسب الناس الل بتدخل أو تطلع منها

معرفش في حد عنده فقاقيع زيي ولا لأ ،  بس لو عندكم   فحافظوا عليها و عرّفوا الناس الل جواها كل شوية إنهم لسه جواها  ،  إنهم جزء منها

و إن وجودهم ف الفقاعة دي مش مرتبط بالوقت الل قضوه فيها  ،  لكن مرتبط بالتكامل ، مرتبط بالصابون الل بيزودوه على الفقاعة دي عشان تبقى متماسكة اكتر  ،  عشان تبقى أفضل ،    مرتبط بكل حاجة أحسن و أجمل من مجرد " المعرفة بحكم الوجود "   :)