Keep on or give up , It's up to u..

كنت باتفرج على الميموريز بتاعة السنين الل فاتت ،  لقيت حاجة كتبتها من سنتين " دوايرنا دايماً مفرغة ..  من كل حاجة " ..

ليه دايما عندنا دواير مفرغة؟ ،  عشان مش بنملّ من التكرار ،  مش بنزهق ،  مخنا ابتدي يتعود على حاجة و ابتدي يرتاح ليها نفسياً لدرجة إنك لو بدلت العادة بعادة أحسن بيبتدي يحصل تقلّب ف المزاج و أحياناً اكتئاب ،  في جملة حقيقية جداً  بتقول "  we first make our habits ,  then our habits makes us" 

بس ليه أصلاً بنستمتع بالعادات دي؟

علشان بنعملها ف لحظات ضيق فا بتساعدنا على تخطّي شعور الضيق ده،  بنلجألها دايماً لما نكون متضايقين عشان تحسسنا بالسعادة  -  لما نكون سعداء فعلاً مش هندور اننا نعملها مثلاً - ..
بتدينا إحساس لحظي بالراحة ،  إنما بعد كده ممكن نرجع تاني نحس بأسوأ من الأول ،  بسبب إحساسنا الأكبر بالذنب عشان كررنا العادة دي ،  لكن بنبطلها؟ ،  ع الأغلب لأ

إزاي " بنتعود" ؟

العادات الإنسانية عموماً بتخضع لحاجة إسمها " cue,  routine,  reward "  أو " trigger,  behavior,  reward" 

بنشوف الحاجة  حلوة ،  بنتعود عليها ،  بنلاقي إحساس السعادة بيزيد كل ما بنعملها ،  بنكرر..

بس أكيد لازم يبقى في حل ،  إيه الحل؟

إنك تبطّل العادة  محتاج نظام معين ،  frame work عشان يبقى التغيير تدريجي و نهائي.

أول خطوة : * تحديد المشكلة  *

               
 
أول حاجة لازم نعرف العادة عشان ساعات مش بنعرف نميّزها من كتر ما بقت روتين ، نحددها  ،   و نعترف بيها ..
ده هيساعدنا نعرف أصل المشكلة فين..

تاني خطوة : * بالراحة مش كل حاجة مرة واحدة *
            

لو العادة هي إنك تشتري كوكيز مثلاً ،  كل يوم كل يوم بتروح الكافيتيريا تجيب كوكيز  و انت مش حاسس أصلاً إن ده عادة غلط ،  لما بتكتشف كدة بتندم ،  و تبدأ تقول لأ أنا مش هجيب كوكيز تاني ،  و هابطّل من بكرة ،  و تبدأ الدفعة دي بخطوة كبيرة جداً بالنسبة لعقلك الباطن  " امتناع تام من اول مرة" ..

و هنا بتحصل المشكلة ،  دماغك بتبتدي تطلب " عادتها " ،  هرمونات السعادة متحفزة و مستنية الحاجة الل انت معوّد نفسك عليها " عشان تبقى سعيد لحظياً"  ..  هتيجي ف أقرب فرصة مهما قاوحت هتقع و ترجع تجيب كوكيز أكتر من الأول ، عشان تقدر تعوّض الفرق الكبير الل عملته..

و جايز تقدر تمتنع ليوم واحد ،  و تيجي اليوم الل وراه تنسى أصلاً و تكرر نفس العادة تاني  بلا وعي ،  بتحس بالسعادة ف الأول ،  بتندم ، بتقول مش هعملها تاني ،  معندكش الإصرار ،  بدأت غلط ،  بترجع تعملها تاني ..  و تبقى دي دايرتك " المفرغة"  الل قلت عليها فوق..

كل العادات زي الكوكيز كدة ،  حاجة حلوة بنحس و احنا بنعملها بالسعادة  ،  في جملة بتوضح حقيقة الإحساس ده :
 " The only way to overcome bad habits is to realize that you are escaping from your true feelings "

احنا بنهرب من أحساسينا الحقيقية بالعادة ،  بنحاول نتجنب التفكير و نشغل نفسنا
،  لما نفكر بنتضايق ،  و احنا مش عايزين نتضايق :D

تالت خطوة  : * نعمل حاجة تاني ف نفس وقت و مكان العادة دي * / * نحجّم العادة * 

لو متعود اني اجيب كوكيز كل يوم ،  ممكن آجي ف يوم معين اشغل نفسي بحاجة تانية ،  أي حاجة تشغل دماغي عن فكرة
" هتروح فين؟  الكافيتيريا زي كل يوم ،  هتجيب إيه؟ ،  هجيب كوكيز طبعاً  كالعادة" 

مع الوقت هلاقي معدل شرا الكوكيز بالنسبالي بيقل  ، جسمي و مخي هيتعود إنه مش لازم الحاجة دي عشان أحس بالسعادة  ، و هيتعود على عدم وجودها  ،  الحاجة زي مش محور حياتي و من غيرها مش هاموت ..

بس أهم حاجة ف ده كله التحمُّل ف الأول ، ، و إنها تيجي تدريجياً ،  عشان ماتحصلش صدمة  أو نخسر الدَفعة الل خدناها ف لحظة ضعف تانية..

رابع خطوة : * الإيقان بالعائد الكويس للتبطيل *  / * الخطة ب *

كل فعل بنعمله ليه رد فعل ،  فلازم نقارن ف وقت ما بين العائد الل كان بيرجعلنا لما كنا بنعمل العادة دي و بين العائد بعد ما بطّلناها  ،  ملاحظة التحسن حتى و لو بسيط بيدي دفعة إنك تكمل ،  كأن عقلك بيقولك " لأ خليك مبطّل ،  أنا بقيت أحسن" 

هنلاقي دايماً إشارات للتحسن ده ،  لازم ندعمها ف دماغنا ،   عشان الانقطاع يبقى نهائي و حتى لو اشترينا كوكيز تاني يبقى مرة كل فترة ،  و مانحسش إن ده لخبط هرموناتنا أو رجعّلنا الأزمة تاني ..

بيقولك دايماً ميّز بين إنك " بتجيب بيتزا كل يوم"  و بين " بتجيب بيتزا كاحتفال بحاجة ليس إلا ،  و إنك مش مدمن للحاجة دي" 

خامس خطوة : * ignore perfectionism  *
                 

في ناس كتير جدا ف خطوات علاجها سواء علاج من إدمان حاجة او حتى علاج عادي بتيأس بسرعة ،  دايماً عايزين نتيجة سريعة و لحظية ،  أنا هجرب الموضوع ده يومين و لو مانفعش هابرر لنفسي إن أنا ضعيف ،  مش قادر ،  هاستني بقى فرج ربنا عشان أنا أضعف من اني أصبر أكتر،  أنا مستعجل يا عم عايز نتيجة ألاحظها بسرعة ،  و ابتدي أخسر القرار الل أخدته 

من غير كلام أكتر ده ممكن نختصره ف *  perfectionism isn't idealistic *

___________________________________

الموضوع مهم ،  و طويل ،  و معقد كمان ، بس إحساس التعافي ده أجمل حاجة ف الدنيا :D

C :
× The Power of Habit
× habit loop
× framework
× habits
× habit loop 2