برافو عليك يا ذكاء ، خطة ف منتهى العم خيري

أنا تقريباً عايشة بنص دماغ و نص اهتمام ،  زمان كنت مجنونة أخبار ،  عشت حوالي أربع سنين نكد بس بسبب السياسة و البلد و بلا بلا بلا زي كدة..

من سنة فقدت الاهتمام تماماً ،  مبقاش يفرق معايا ايه الل بيحصل ،  و لا بيهمني أعرف حاجة..

النهاردة و امبارح و من أول الأسبوع كانوا أيام عادية بالنسبالي ،  صحيت لقيت تريندات ظهرت و تريندات اختفت ،  حاجات ف التايملاين كتيرة جدا مش فاهماها ،  و ماهتميتش أفهمها ،  مصر بتلعب مع نيجيريا ،  يااه هي مصر لسه بتلعب كورة؟  :D ،  طيارة اتخطفت ،  قبرص،  there's always a woman  ،  يا ريتني كنت أنا ،  و شوية أخبار من عالم سمسم ،  و ظهر التريند الجديد للنور  ،  قبرص و حلاوة قبرص و قلوب قبرص و الرواشة الكتير اوي ع الموضوع ده ،  الكومنتات غرقانة العم خيري ،  الحقيقة انا كنت شفت الفيلم الل منه الافيه ده أكتر من أربع خمس مرات ،  و عمري أصلاً ماخدت بالي منه ،  إنما طبعاً بقى تريند دلوقتي و موجود ف كل كومنت ف كل شبر..

الچيبات بقت موضة ،  البسوا چيبات ،  الفساتين بقت موضة ،  البسوا فساتين ،  البنطلونات رجعت موضة تاني ،  لف و ارجع تاني ،  اللون ده هو تريند الصيف ،  الناس كلها تلبس اللون ده أو يبقى راشق ف اي حاجة  -  بغض النظر عن تقبلك للألوان دي -  لكن دي موضة !..  لما الناس تتجمع حوالين حاجة تبقى دايماً صح..

واحد من كل خمس تريندات على تويتر بيتكلم عن حاجة مهمة فعلاً  ،  بس مابيتشافش قصاد كمية الكراودز الل بتعمل فولو عشان يتعملها فولو باك  ..

كل الناس اتفرجت على ايفيل ديد ،  معظم الناس عندها رأي واحد ،  كل الناس بتأمّن على كلام كل الناس ،  لما ماتعرفش تكوّن رأي واضح عن تريند ممكن تشوف كل البيدجات قايلة إيه و تقوله  ،  ده رأي الأغلبية فأكيد هيبقى صح ..

انك تكون عكس تريند دي بتبقى حاجة غريبة نوعا ما ، ايه ده لما كل الناس بتقول كذا ،  انتا الل صح يعني؟..  و يا عم ماهي ماجتش عليا  ..

العالم كله اتجنن..
احنا هننتهي نهاية بشعة ،  ربنا يرحمنا منها..

كان نفسي اجيب لينكات و انظم الكلام و كدة ،  بس بصراحة انا مش فايقة خالص لحاجة زي دي و جوجل تعبان معانا والله  



شوكران   o\