ليه بحب أضيع وقت؟ " الجزء الأول"

قريت كلام كتير أوي و اتفرجت على ناس كتير جدا بتحكي قصص و حاجات عن التسويف أو تضييع الوقت و الزنقة ف آخر لحظة ..

و زي جلسات علاج الإدمان :

اعرفكم بنفسي الأول ،  انا miss procrastinator ،  عايشة ف جزيرة البلا بلا بلا  ،  مابعترفش بأداء الأعمال أول بأول  أو يمكن مباخدش بالي أنها أعمال فعلاً غير لما الوقت يأزف :D

عندي ثقافة وحشة جدا اسمها " ثقافة الآخر لحظة"  ،  دايماً أغلب قراراتي و انجازاتي الكونية مؤجلة لآخر لحظة لدرجة اني باحس بالغرابة لو خدت قرار بسرعة و بقعد اراجع فيه لحد آخر لحظة بردو :'D

،  كل مرة بالحق نفسي ،  و بقيت للأسف معتمدة على ده..

ضميرك فين؟ ،  ضميري بيأجل زيي بالظبط ،  معرفش ليه عيب التصنيع ده بس هو كده ،  و بيفتكر يصحى ف أوقات عجيبة جداً يعني الل هوا خليك نايم ما كان من بدري -  مثلاً !  - ..

أنا ليه بروكراستينيتور يا أدمن؟ ،  عشان بفكر دايماً مش ف " how to get fun after hard work "   ، لأ بفكر ف " how to get fun &  fun to recharge and begin hard work " ...

دايماً بقول لما هييجي عليا وقت و عارفة اني هاشتغل فيه بجد ،  اتعب نفسي ليه دلوقتي و انا ممكن اقضي وقتي ف حاجات ممتعة اكتر من التاسكس؟

ليه احرق ف اعصابي على مراحل لما ممكن احرقها مرة واحدة ؟ ،  اللحظة الل بتروح دي ،   تضيع ليه ف تاسك مش هيديني متعة و انا بعمله ؟
مع ان المفروض أن الشغل ف الوقت ده بيدي وقت متعة اكتر ،  بس الطمع وحش :D

الأهم من ده كله و الل عملت ايديت عشانه ،  لحد دلوقتي بقول لنفسي " ايه ده انتي عايزة تذاكري اول بأول و تبقى ليلة الامتحان مراجعة كده من غير ساسبنس أو أدرينالين زيادة؟! ،  ايه الملل ده :D  "  

ايه لازمة الهري ده؟

دي اعترافات  شكلية يعني لحاجات بحاول إنها تتغير  " بحاول والله" 
،  هخليها هنا لحد ما ييجي اليوم الل ابقى فيه انسان مجد ..  بيعمل كل حاجة اول بأول ،  و بيحضر محاضرات الاناتومي  و سكاشن الحاسب و بيركز ف البايو  و بيرسم  الفيزيكولار نيوكلياس فيزيكولار فعلاً   :DD