خمس سنوات من الهُراء ..

كنت اعتزلت !!
بعد فترة كبيرة جدا استهلكت من عمري سنين من التعب و اﻹجهاد النفسي صدقت ف انه مفيش فايدة .. كان دايما الحل اﻷمثل هوا البعد ، عدم التفكير ، لا مبالاة حقيقية أو تبلد مش عارفة ..
و فعلا استريحت  !
ثبتت فكرة ان اي حد فينا برغم كل الهوجة الل فيه مايسواش حاجة قصاد منظومة بتاكله يوم بيوم  ، و بتلغيه و بتهمشه و لو نطق تضربه عشان يسكت ! :)
بنفس أغرب منطق كوني انك تضرب الل بيعيط عشان يبطل عياط ..

برغم ده كل الثورة دي أكتر حاجة ممكن أفخر بيها ف حياتي ، أول نقطة نور و تحول ف تفكيري و ف عقلي بالكامل ، عمري ما ندمت عليها و لا هاندم علي احتسابي علي فكرها و عقيدتها ف يوم من اﻷيام ..

ذكري 25 كانت من يومين و انا مش مصدقة انه عدي عليها خمس سنين ، خمس سنين !
خمس سنين منهم أربع سنين إجهاد و خناقات و نقاشات و خوف و قلق و صراع !!
مكنتش عارفة أكتب أي حاجة ، أو مكنتش قادرة ..
كل ذكري مش بتفرق معايا عن التانية غير ان عداد الشهدا و المظاليم بيزيد ، مش بتفرق غير اني بامتعض اكتر و اكتر ، مش بتفرق غير ف انعا بتزود سنة علي عداد السنين و تعلمني اللامبالاة الحقيقية ..

عندنا قيادات ب iQ دبانة ، عندنا منطق يختلف عن كل أنواع المنطق المعروفة .. عندنا تدليس و تطبيل و خلط .. عندنا كل الملكات الل تساعدنا نطلعك كداب  .. و نفس الملكات الل نخليك بيها كداب عشان تعيش
احنا هنا مش مرغومين علي حاجة خالص ، كل حاجة و ليها مردود بنفس قوتها
هتداري علينا هنحبك هتنطق هننهيك ، قمة العدل ! :(

واضح اننا هنفضل عيال سيس طول عمرنا .. واضح ان الخوف زي النيل  ، لازم يرتبط بيك عشان تعيش
واضح ان البلد دي مفيش منها رجا .. بل كل سنة عن التانية بيثبت ان مفيش من رجا
هل الشهدا هيسامحونا ع الل احنا فيه ؟ .. آه أكيد هيسامحونا .. احنا نفسنا نروحلهم ، احنا شجعان علي فكرة .. بس عمرنا ما كنا بقوتهم !
ارقدوا في سلام
ادعولنا ربنا يخرجنا منها بسلام
خرّجنا منها نضاف .. الدم مش ع الكف .. خرّجنا منها ألف .. أو مية .. أو واحد ! :)