... ( 14 يونيو 2013 )
آسفة جدا ع التخلف ده :''D
"ربنا يرحمه :) "
.
.
.
ممكن حد فيكم يقف عند الكلمتين دول للحظة ... بنظرة هتقولوا المفروض " :) " تبقى
" :( " .... و انى كده مش مراعية المشاعر او هكذا ...طب انا هاقولك أد ايه الل مات ده محظوظ و قد ايه احنا الل خسرانين و اننا لما بنبكى بنبكى على نفسنا !!
يعنى الل مات ده لما بدأ حياته ف مستشفى لا تصلح للعلاج او التعاملات الآدمية و يسكت عشان مجرد الظروف الل مش مساعدة و اهله يصبروا و يثابروا و يدخلوه تعليم حكومى قلّته احسن ... يتعلم لمجرد انه يتعقد بعد كده ..يتدرّس مناهج عقيمة .. يخرج افشل مما دخل ....يمشى ف طريقه بدعا والديه ...يخاف!! ...يخاف يخذلهم او يطلع حاجة ماترضيهمش ... يتعايش وسط مجتمع عنصرى بطبعه ... مادى بطبعه ...و يا وصل يا ماوصلش !!!
..يدوّر على وظيفة كعب داير... يفضل حاير وسط اصحاب المال و اصحاب السلطة .... يحس بمدى المعاناة و الذل لما افشل واحد يلاقى الوظيفة الل هو بيحفى عشان يوصلّها ..لمجرد انه معاه فلوس و ابن حاجة كبيرة ف البلد .... يفضل حاير بين العباد شايف لكل طريق يخطّيه يدود و سواد ...فضل معانى و ساكت ..مستنى الارض الصلبة الل ممكن يقف عليها عشان يطلب حق طال عمره ...و طال تمسّكه بيه ...!!
شغلانة محترمة تأكل عيش و تقضى يومه هو و اهله الل بقى كل اعتمادهم عليه .... جه ف يوم قال نازل ..و احتمال مش راجع ...متخافوش ... و لو رجعت هيبقى حلمى ف ايديّا ... و لو مارجعتش ..انزلوا ف كل شارع و اعترضوا ... ماتبكوش ...دى امانتى ..ماتبكوش :)
بلا مبالاة و ابتسامة لطيفة ودّعهم ...و نزل ... اول ما وصل ..حسّ بنشوة كده...احساس جديد ... حسّ انه رجع بنى آدم ليه صوت و ليه نفس ..ليه حلم و ليه مستقبل ...ليه ايد و ليه دور .... بدأ الصوت يعلا بالهتاف ... خد فترة على ما يوعى انهم كانوا بيرددوا وراه ...طب ازاى و انا ماحفظتش شعارات و لا كلام من ده!! ...
المرة دى قلبه هو الل كان بيتكلم ..ضميره هو الل اصرّ انه يصحّى كل ظالم و يقولها ف وشه " معاك انا اتبهدلت كتير.... كرامتى هترجع ؟! ...آه هترجع ..برحيلك انت ...انت الل ياما دست عليا و عاملتنى بحقارة هاحرمك من سطوتك "
الصوت بيعلا و بيعلا ..هدير الهتاف زى الموجة يوصل لآخر الناس و يرجعله تانى ..صدى جميل طَرِب ...حاجة حلوة فعلا ..روح جديدة و امل جديد برغم صوت الرصاص ....
الهتاف وقف .... القائد مات !!!
جاى انت بعد ده كله تعيّط عليه ..المفروض تفرحله ..ده اكتر واحد فينا استريح ..... هو دلوقتى ف مكان احسن من هنا 100 مرة لا فيه عسكر ولا اخوان و لا قتلة و لا مؤامرات و لا انهيارات ... هو دلوقتى عند ربّه بيحمده على نعمة الموت الل حباه بيها ... الل بيحصل ده كل يخلينا نكتشف ان الموت اصطفاء!! ...احسن ناس بتموت ..اشرف و اجدع ناس بتموت ... ..
و ف النهاية هو ده المصير ...يبقى دايما ...ربنا يرحمه بابتسامة :)
.png)
Comments
Post a Comment